Wasirka Wasaaradda Gaashaandhigga Somaliland, Mudane Maxamed Yuusuf Cali, oo uu wehelinayo Taliyaha Ciidanka Qaranka Somaliland Sareeye Gaas Nimcaan Yuusuf Gaaxnuug, iyo saraakiil sare oo ka tirsan hoggaanka ciidanka, ayaa maanta kormeer iyo indho-indhayn ku tagay Dugsiga Tababarka Kamadosta ee ku yaalla degmada Cadaadley.
Kormeerkan ayaa ujeeddadiisu ahayd in masuuliyiintu si dhow ula socdaan xaaladda guud ee dugsiga, heerka tababarka ay qaadanayaan askarta, tayada macallimiinta tababarka bixiya, iyo agabka loo adeegsado tababarrada ciidanka Qaranka.
Intii ay masuuliyiintu ku sugnaayeen dugsiga, waxa ay warbixinno faahfaahsan ka dhegaysteen taliyeyaasha dugsiga iyo saraakiisha masuulka ka ah tababarka, kuwaas oo ka warbixiyey horumarka tababarka, caqabadaha jira, iyo baahiyaha u baahan in wax laga qabto si kor loogu qaado tayada iyo hufnaanta ciidanka.
Wasirka Wasaaradda Gaashaandhigga Somaliland, Mudane Maxamed Yuusuf Cali, ayaa bogaadiyey dedaalka ay wadaan macallimiinta iyo saraakiisha tababarka, isaga oo xusay in tayeynta tababarka ciidanku ay tahay tiirka ugu muhiimsan ee adkaynta amniga qaranka. Waxa uu hoosta ka xarriiqay in wasaaraddu ka go’an tahay horumarinta dugsiyada tababarka, qalabaynta ciidanka, iyo kor u qaadidda aqoonta, anshaxa iyo kartida askarta.
Dhankiisa, Taliyaha Ciidanka Qaranka Somaliland Sareeye Gaas Nimcaan Yuusuf Gaaxnuug ayaa askarta ku dhiirrigeliyey inay si buuxda uga faa’iidaystaan tababarka ay qaadanayaan, kuna shaqeeyaan anshax, waddaniyad iyo u heellan adeegga qaranka. Waxa uu sidoo kale xusay in hoggaanka ciidanku mar walba mudnaan siinayo horumarinta xaaladda shaqo iyo midda nololeed ee ciidanka Qaranka.
Gabagabadii, kormeerkan ayaa qayb ka ah dadaallada joogtada ah ee ay xukuumadda Somaliland ku tayeynayso Ciidanka Qaranka, si loo helo ciidan tababaran, karti leh, una diyaarsan difaaca dalka iyo sugidda amniga guud.
