Wasiirka Arrimaha Dibadda Israa’iil Gideon Sa’ar, ayaa sheegay in aqoonsiga ay Israa’iil siisay Jamhuuriyadda Somaliland aanu qayb ka ahayn in dadka reer Falastiin ee Marinka Gaza ku nool loo raro dhulka Somaliland.
Wasiirka oo xalay waraysinsiiyay telefishinka Channel 14 ee dalka Israa’iil laga leeyahay waxa uu yidhi; “Kuma jirto heshiiska u dhaxeeya Israa’iil iyo Somaliland wax la xidhiidha in dadka Qasa la geeyo Somaliland.”
Hadalkan Wasiirka Arrimaha Dibadda Israa’iil ayaa meesha ka saaraya eedaymo ay qaar ka mid ah madaxda dalalka Carabta iyo Soomaaliya ku doodayeen oo ah in Somaliland ay aqoonsiga Israa’iil dhaafsatay in reer Gaza loo soo raro.
